ഒരു ഋതുവസന്തം പൂത്തിറങ്ങിയ
മഴയുടെ ഇലച്ചാർത്തിൽ
ചെമ്പനീർപൂവ് നീട്ടി
രാഗമേഘമായ്
നീയെന്നിൽ പെയ്തിറങ്ങി…
ഒരുമിച്ചു ചൊല്ലിയ
കവിതയും
ഒഴുക്കിവിട്ട കളിവഞ്ചിയും
നനഞ്ഞ പ്രണയമഴയും
മായാത്ത ഓർമകളായി…
വിരൽ കൊരുത്തു പിന്നിട്ട പൂമേടും
പറയാതെ പറഞ്ഞ മോഹങ്ങളും
മിഴിയിണ കൂട്ടിമുട്ടിയ അനുഭൂതിയും
ഒരു മഴയ്‌ക്കൊപ്പമായിരുന്നു…
മാന്തളിർ നുള്ളിയൊരു മഴസന്ധ്യയിൽ
മൗനം പൊതിയുമൊരു സ്നേഹച്ചില്ലയിൽ
കവിൾത്തടം നനച്ചൊരു ചുടുചുംബനമായ്
ഹൃത്തടം കവിഞ്ഞു നീ നിറസുഗന്ധമായ്…
നൂപുരധ്വനികളിൽ കുപ്പിവളക്കുളിരിൽ
പ്രാണന്റെ തുടിപ്പായ്…
ആറ്റിരമ്പിൽ വിരിയും
താമരപ്പൂക്കളും തേന്മൊഴികളും
മഴനീർക്കനവുകളായ്…
ഒരു കുഞ്ഞുപൂവിന്റെ സൗരഭ്യം പകർന്ന്
മൃദുമേനി കുളിർപ്പിച്ച ഇളംകാറ്റിനും
പുണരാൻ കൊതിച്ച കാൽച്ചിലങ്കകൾക്കും
മഴയുടെ സംഗീതമായിരുന്നു…
No comments:
Post a Comment