അപൂർവരാഗം

ഞെരിഞ്ഞമരുന്ന കരിയിലകൾക്ക് -

ശാപമോക്ഷത്തിന്റെ പഞ്ചാക്ഷരിയുമായി...  

വൈകിയെത്തിയൊരു മഴയുടെ-

കുസൃതിപ്പൂക്കൾ മണക്കാതെ... 

ഹോമാഗ്നി തൻ ഹവിസ്സിലെ

മോഹമുത്തുകൾ പെറുക്കാതെ... 

കലിയടങ്ങാത്ത കടവാവലുകൾക്കും-

വലകൾ നെയ്ത ചിലന്തികൾക്കും ഓമൽനാദമായ്-  

ഇരുണ്ട ഇടനാഴികളിൽ എറിയുംകുറഞ്ഞുമീ  

ഒടുങ്ങാത്ത പാദപതനത്തിൻ ധ്വനി ...

നേർത്ത വെളിച്ചത്തിൻ ദൂതുമായ്‌-

ഒരു കണ്ണേറിനു പോലും ഇടനൽകാതെ-

വീശിയടിയ്ക്കുന്ന തണുത്ത കാറ്റിനെയും ഭേദിച്ച്‌-

ഒരു നോട്ടപിശകിൻ പാപഭാരവുമില്ലാതെ- 

കണ്ണാടിമനസ്സിൻ  ചിമിഴുമായി വീണ്ടും നീ എന്നിലേയ്ക്ക് ... 

പൂപ്പൽ പുരണ്ട ചിന്തകൾക്ക് -

തിരിച്ചറിയാനാകുന്നില്ല  നിന്നെ... 

ഓർമകളുടെ ചെമന്നപൊട്ടുകൾ-

അപ്പോഴും ആ കണ്ണുകളിൽ-

അപൂർവരാഗത്തിന്റെ കഥ തിരയുകയായിരുന്നു...